Grófar afstöðumyndir eða vegakort.




Í Landnámabók segir svo frá landnámi á Svalbarðsströnd :

Skagi Skoptason hét maður ágætur á Mæri í Noregi. Hann varð ósáttur við Eystein glumru og fór af því til Íslands. Hann nam að ráði Helga hins magra, Eyjafjarðarströnd hina eystri, út frá Varðgjá, til Fnjóskadalsár. Hann bjó í Sigluvík. Hans sonur var Þorbjörn, faðir Héðins, er Svalbarð lét gera 16 vetrum fyrir kristni.'' Talið er líklegt, að Helgi magri hafi numið hér land um 890. Skagi hefur komið nokkru síðar, líklega ekki fyrr en eftir 900.

Svalbarð. Bærinn stendur á háum bakka, ofan við eyri nokkra, sem dregur nafn af bænum. Nafnið mun dregið af hafgolunæðing þeim, er hér er tíðum. Hefur Héðni bónda þótt svalur gustur á barðinu. Ekki vita menn, hvenær fyrst var byggð kirkja á Svalbarði. Verður að ætla það eftir líkum. Í Auðunnarmáldaga 1320 voru henni talin til eignar 5 málnytukúgildi og 5 í lausagóssi, eða alls 10 hundruð. Hefur hún þá varla verið nýbyggð. Síðasta kirkjubygging,(Byggð 1846.) áður en núverandi kirkjuhús var byggt, stóð sunnan við bæinn, en er nú við minjasafnið á Akureyri. Kirkjan sem nú stendur á Svalbarði, Svalbarðskirkja var vígð 30 maí 1957.(Sjá tengil á myndir neðst á fréttasíðu.) Hún stendur ofan við bæinn, á þeim stað sem heitir Réttarhóll, en þar var fjárrétt Svalbarðsbænda. Af því örnefni, er nafn gróðrarstöðvarinnar dregið.

Gróðrarstöðinn er í littlum skógarreit, sem Skógræktarfélag Svalbarðsstrandar gróðursetti á árunum 1956 til 1963. Þar var meðal annara tegunda plantað út miklu af Skógarfuru, sem nú er að mestu horfin, en í rjóðri sem þá myndaðist, höfum við komið okkur fyrir, en allur reiturinn er í okkar umsjá. Talsvert hefur verið grisjað og gróðursett í reitinn eftir að bygging stöðvarinnar hófst, þó minna en við hefðum viljað.


---